‘Maguindanao massacre, worst election related incident’ – Comelec

ILOILO CITY – Itinuturing ngayon ng Commission on Elections (Comelec) na pinakamalalang election related incident ang nangyaring masaker sa Maguindanao.

Sa panayam ng Bombo Radyo Iloilo kay Atty. Ferdinand Rafanan, Law Department head ng Comelec, sinabi nito na ang nangyaring masaker ay nagpapakita ng sukdulang kabangisan na hindi inaasahang magagawa ng isang tao.

Sa ngayon, maliban sa posibleng maagang pagsailalim sa Maguindanao sa election hot spot at Comelec control, pag-aaralan rin ang posibleng paglipat ng venue ng filing ng certificate of candidacy.

Kasunod nito, nagbabala ang Comelec sa mga politiko na may itinatagong private armed men lalo na sa Maguindanao.

Sinabi rin ni Rafanan na pag-aaralan ng Comelec en banc ang kanilang magiging hakbang para madis-armahan ang mga armed men sa Maguindanao na ginagamit ng mga politiko dahil sa ngayon wala pa sa kontrol ng Comelec ang PNP at AFP dahil hindi pa nagsisimula ang election period.

Matandaan na kahapon nakatakda sanang mag-file ng COC si Buluan Vice-Mayor Ismael “Toto” Mangudadatu sa pamamagitan ng asawa nito kasama ang mga kapatid, abugado at miyembro ng media nang harangin umano ang mga ito ng mahigit 100 armadong lalaki at saka pinatay.